Wasiirka Wasaaradda Shaqada & Arrimaha Bulshada XFS, Mudane. Prof. Salim Caliyo Ibraw, ayaa ka qayb galay Munaasabad heer sare ah oo diiradda lagu saarayey sidii loo horumarin lahaa helitaanka maaliyadda ee ganacsiyada yaryar iyo kuwa dhexdhexaadka ah (MSMEs) iyo qaybaha wax-soo-saarka ee Soomaaliya, ayaa lagu qabtay magaalada Muqdisho.
Munaasabadan, oo ay soo qabanqaabisay AECF (Africa Enterprise Challenge Fund) iyadoo kaashaneysa Midowga Yurub (EU) ee Soomaaliya, ayaa isugu keentay mas’uuliyiin dowladeed, la-hawlgalayaasha horumarinta, hay’adaha maaliyadeed, iyo jilayaasha ganacsiga gaarka loo leeyahay.
Wasiirka ayaa la wadaagay fikradihiisa iyo aragtida wasaaraddiisa ee ku saabsan waajibaadka ay ka leeyihiin shaqo abuurka iyo ilaalinta xuquuqda shaqaalaha Soomaaliyeed.
Ka qaybqaadashada wasiirka iyo daneeyayaasha kale ee muhiimka ah ayaa si weyn u kobcisay dooda, waxayna gacan ka geysatay xaqiijinta ujeeddooyinka guud ee dhacdada, iyadoo la adkeeyay muhiimadda iskaashiga dowladda iyo la-hawlgalayaasha horumarinta si loo gaaro horumar dhaqaale oo waara oo loo dhan yahay.
Kulankan muhiimka ah ayaa ujeedadiisu ahayd in la iska xog wareysto, lagana wada hadlo kor u qaadida ka mid noqoshada maaliyadeed iyo taageerada loo fidinaayo MSMES-yada, kuwaas oo ah laf dhabarta dhaqaalaha Soomaaliya. Intii lagu guda jiray munaasabadda, waxaa si gaar ah loogu iftiimiyay Barnaamijka Maaliyad Koritaanka Loo Dhanyahay (FIG) oo ay maalgaliso EU-du, kaas oo loo soo bandhigay inuu yahay tusaale waxbarasho oo muhiim ah.
Gebogebadii, munaasabaddu waxay ku dhammaatay guul weyn, iyadoo la dejiyay qorshayaal cusub oo lagu xoojinayo nidaamka maaliyadeed ee dalka iyo in la hubiyo in helitaanka maaliyaddu uu gaaro qof kasta oo Soomaaliyeed oo u baahan, gaar ahaan kuwa ku jira qaybaha wax-soo-saarka ee firfircoon.
