Wasiirka Wasaaradda Shaqada iyo Arrimaha Bulshada ee Jamhuuriyadda Federaalka Soomaaliya, Mudane Prof. Salim Alio Ibro, oo ay wehliyaan wafdiga saddex-geesoodka ah ee Soomaaliya oo ay ka mid yihiin wakiillo ka socda Dowladda Federaalka Soomaaliya, Xiriirka Ururrada Shaqaalaha Soomaaliyeed (FESTU), iyo wakiillo ka socda Rugta Ganacsiga iyo Warshadaha Soomaaliyeed, iyo sidoo kale la-taliyeyaasha Wasaaradda, ayaa kulan heer sare ah la yeeshay Agaasimaha Guud ee International Labour Organization (ILO), Mudane Gilbert F. Houngbo.
Kulanka ayaa diiradda lagu saaray dardargelinta hirgelinta ajandaha Decent Work, xoojinta iskaashiga u dhexeeya Soomaaliya iyo ILO, iyo taageeridda dadaallada Dowladda Federaalka Soomaaliya ee lagu yareynayo shaqo la’aanta, laguna abuurayo fursado shaqo oo waara, gaar ahaan dhalinyarada iyo haweenka.
Sidoo kale, labada dhinac ayaa ka wada hadlay horumarinta siyaasadaha suuqa shaqada, kobcinta xirfadaha shaqaalaha, iyo xoojinta barnaamijyada horumarineed ee kor u qaadaya caddaaladda bulshada iyo kobaca dhaqaale ee loo dhan yahay.
Wasiirka ayaa uga mahadceliyey Agaasimaha Guud ee ILO taageerada joogtada ah ee uu siiyo Soomaaliya, isaga oo adkeeyey sida ay Dowladda Federaalka Soomaaliya uga go’an tahay xoojinta wada-shaqeynta saddex-geesoodka ah iyo hirgelinta halbeegyada caalamiga ah ee shaqada.
Kulankan ayaa qeyb ka ah kulamada heerka sare ee ay wafdiga Soomaaliya ka wadaan Shirweynaha 114-aad ee International Labour Conference (ILC 2026), kaas oo ka socda Xarunta Qaramada Midoobay ee Geneva.
——— DHAMMAAD ———
